O último sábado de novembro estivo pasado por auga a ratos, pero cheo de atletismo durante toda a mañá no CGTD, onde se celebrou o XXIX Trofeo Cidade de Pontevedra, última proba do Circuíto de Atletismo en Pista deste ano, que fora adiada por mor das obras levadas a cabo nas pistas.

No lanzamento de peso a mellor da xornada foi Evelyn Fernández, do Club Atletismo Narón, lanzando 10.85 metros, seguida de María Teresa Janeiro, do filial Club Atletismo Sada e seguida de Erika Fernández Guede, tamén do Club Atletismo Narón.

Na categoría de lanzamento de peso de 3 kg a mellor foi a atleta do Rías Baixas, Aitana Capeáns, seguida de Sabela Vázquez, do Beade, que asinou unha mellor marca persoal e da atleta da Gimnástica, Cristina Martínez, que conseguir a súa mellor marca da tempada.

No lanzamento de peso de 1kg as tres mellores foron as atletas da Gimnástica Sara Mourente, Xiana Estévez e Sabela Coejo.

No caso da categoría masculina, foi Hugo Novoa, do CD La Purísima quen conseguiu o primeiro posto na categoría de 4kg, sendo os 12.05 metros conseguidos a súa mellor marca persoal. No caso do peso de 5kg, o mellor foi Martín Liñares, do Club Atletismo Negreira e o mellor lanzando o artefacto de 6kg o mellor foi o actual Campión Galego, o Gimnástico Eloy Acuña, establecendo a súa mellor marca persoal en 11.83, seguido do seu compañeiro, Samuel Fernández. Eloy tamén sería o mellor na proba de lanzamento de disco, no seu caso, de 1,5 kg, augurando unha moi boa tempada para este 24-25.

No peso de 1kg os tres primeiros postos foron para os atletas do club, Teo Castiñeira, Álex Gómez e Adrián Bienvengut.

No triplo destacaron, en cateogría feminina, as gimnásticas Irati Legazpi e Marina Artemia Pérez, primeira e segunda respectivamente, acompañadas de Noa Currás, terceira, que conseguiu unha nova marca persoal. Marina, ademais, sería a primeira na súa final do 60 metros lisos. No caso dos rapaces, non houbo marcas persoais, pero destacaron Gonzalo Cuns, do Negreira, Isaac Casal, da Gimnástica e Bruno Castro, do Ferrol Atletismo, primeiro, segundo e terceiro, respectivamente.

Na distancia longa, neste caso os 2000 metros lisos, de novo se impuxo, con autoridade, Sabela Martínez, atleta da Gimnástica, que asinou un primeiro posto por diante da atleta do SD Compostela Atletismo, Paula Fernández e de Leyla Villar, do Ourense Atletismo. En categoría masculina o máis rápido o gimnástico David de la Fuente, quen chegou primeiro con vantaxe sobre o seu compañeiro, Pablo Ulla, quen foi segundo desta vez.

Durante a mañá tamén se disputaron probas de velocidade, como o 50 metros lisos ou o 500, onde Lía Geralavicius, atleta do club, quen ven de facer podio no I Cros Cidade de Pontevedra hai unas semanas, foi a máis rápida na súa final de categoría sub10-12.

Na proba dos 60 metros lisos cabe destacar a final 2, onde os tres primeiros clasificados, os irmáns da Gimnástica Guillermo e Nicolás Piñeiro López, e o atleta do CD Pinarium, Óscar Rodal, conseguiron as súas novas mellores marcas persoais, como tamén fixo a súa compañeira Carlota Vázquez, esta vez na súa final do 300 metros lisos, sendo segunda por detrás da tamén gimnástica Marina Artemia Pérez.

Con estes grandes resultados púxose final ó Circuíto de Atletismo en Pista 2024. Dende o club agradecemos a Froiz polo seu apoio á promoción do atletismo e da práctica deportiva, así como ó resto de colaboradores e organizadores pola súa implicación e axuda.

A próxima parada do club é a organización da San Silvestre 2024, que traerá novidades. Atentos ás redes!