A Sociedad Gimnástica de Pontevedra ten unha cita o sábado coa cidade de Pontevedra

A Sociedad Gimnástica de Pontevedra ten unha cita o sábado coa cidade de Pontevedra

O V Saltar na Rúa celebrarase o sábado 28 de agosto ás 19:30h na Ponte do Burgo, en Pontevedra. Un ano máis a Sociedad Gimnástica de Pontevedra organiza este evento da man do Concello de Pontevedra e da súa concellaría de deportes.

O Saltar na Rúa é un evento que se empezou a organizar no nonaxésimo aniversario do club pontevedrés e que, dende entón, buscou achegar o atletismo ás rúas de Pontevedra. Para iso, fanse exhibicións de tres disciplinas atléticas como son o salto de lonxitude, o triplo salto e o salto con pértega. Deste xeito, o público poderá desfrutar desde deporte de xeito máis achegado, sen ter que ir ata un estadio.

Por segundo ano consecutivo organízase na Ponte do Burgo por ser un lugar menos concorrido e de paso e así pódense cumprir mellor as medidas sanitarias marcadas pola pandemia e evitar aglomeracións.

Para dar espectáculo, participarán atletas de nivel autonómico, nacional e incluso internacional. Unha participación que mesturará a nenos e nenas das escolas do club con algúns dos atletas galegos máis destacados das disciplinas.

24 atletas

En lonxitude competirán Andrea Villaverde, Matías Moldes, Marta Barragáns, Diego Míguez, Eva Queimaño, Pablo Modia, Lucía Sánchez e David Ferrer.

Sofía Rivas, Tomás Adega, Ariadna Gil, Adrián Villares, Tania Valverde, Xoel Otero, Alba Cuns e Alfondo Palomanes participarán en triplo salto.

No salto con pértega estarán Marina Pérez, Lisa Vosberg, Bea Viteri, Nerea Fernández, Óscar Monteagudo, Santi Ferrer, Tomás López e Gerson Vidal.

Na súa presentación oficial, celebrada o 24 de agosto no Concello de Pontevedra coa presenza de Santi Ferrer, director técnico da proba, e Tino Fernández, concelleiro de deportes, o político fixo alusión á seguridade que lle da organizar eventos coa entidade deportiva porque xa son expertos en probas atléticas, tanto por este evento, como as outras probas. E engadiu que “a pesar da pandemia organizáronse outros eventos como o Medio Maratón de Pontevedra ou a San Silvestre que este ano foi unha Rara, pero San Silvestre, grazas á Sociedad Gimnástica de Pontevedra, que é un club decano e dos máis destacados do atletismo galego”.

A historia da San Silvestre percorre as rúas de Pontevedra

A historia da San Silvestre percorre as rúas de Pontevedra

A Sociedad Gimnástica de Pontevedra e o Concello de Pontevedra inauguraron na mañá do 23 de decembro a exposición dos 37 anos da San Silvestre Pontevedresa. En varios carteis recóllense fotografías e recortes de xornais de diferentes edicións da mítica carreira de nadal.

Ao acto, que comezou as 11:00h, acudiron Tino Fernández, Concelleiro de Deportes do concello da cidade do Teucro; Estalisnao Durán, primeiro gañador da San Silvestre; a nosa presidenta, Charo Castro; Víctor Riobó, director técnico do evento; e Patricia Novás, representante de Panaderías A’ Devesa, empresa que patrocina a exposición, mostrando unha vez máis a súa aposta polo deporte local.

37 anos de historia

A San Silvestre de Pontevedra naceu en 1977, con motivo das “vodas de ouro” da nosa entidade. Nesa edición participaron 652 atletas. Despois de varios anos de parón entre 1980 e 1990 recuperouse e o número de inscritos foi en aumento ata chegar aos 7000 participantes do ano pasado.

Neste recorrido histórico, un nome destaca sobre o resto. Víctor Riobó é o atleta máis laureado con doce vitorias, oito delas consecutivas. En mulleres, Águeda Blanco e Solange Pereira empatan no máis alto da clasificación con catro trunfos cada unha.

A Sociedad Gimnástica, ademais de ser o club organizador, tamén é o que máis veces estivo representado no máis alto do podio. Rogelio Barragáns foi o primeiro en gañar a San Silvestre vestindo a camisola branquiazul. Foi no 1979. Na edición seguinte, no 1985 faríao Manuel Franco. Luis Outeiriño, Rafael Fuentes e Jose Antonio Ramallo e Víctor Riobó en varias ocasións completarían a lista en participantes masculinos. En categoría feminina, Ángela Sobreira sería a primeira en 1991. Ademais dela, estarían Miriam García, Joselyn Brea e Iria Rodríguez para completar a lista. En total, 12 atletas da Sociedad Gimnástica de Pontevedra gañaron a San Silvestre.

A exposición estará na Rúa Montero Ríos, ao lado da Alameda ata o 15 de xaneiro.