Este sábado 24 de agosto tivo lugar a VIII edición do Saltar na Rúa. Un ano máis a Ferrería foi punto de parada para moitos cidadáns e visitantes que, curiosos, agardaban ver unha exhibición das tres modalidades de saltos do atletismo: lonxitude, triplo salto e salto con pértega.

A tarde resultou ser un auténtico espectáculo onde os atletas, aínda de vacacións, sen adestrar regularmente e cun pasillo de carreira máis corto do que adoita empregarse para as competicións, sacaron o mellor para levantar as ovacións dos presentes.

Romperon o xeo os atletas de salto de lonxitude. Levantaron os aplausos do público presente (e a area do caixón de salto), Pablo Modia e Antía Pernas, do Lucus Caixa Rural Augusta, Laila Lacuey e Asier San Sebastián, do Atletismo Pamplona e Raúl Cortizo, Andrea Villaverde e Sergio Coello, atletas da Gimnástica. Foi Sergio esta vez quen conseguiu a mellor marca masculina cun salto de 6.65 metros. Da representación feminina foi Laila Lacuey que realizou o salto máis longo, chegando ó 5.55 metros.

Seguíronlles os compañeiros que ían realizar unha tremenda exhibición de triplo salto. Acompañáronnos esta vez Uxía Paz, do Atletismo Alcorcón, que realizou o mellor salto da tarde acadando os 11.15 metros. Xunto a ela saltaron Irati Legazpi e Marina Artemia Pérez, da Gimnástica, e Ana Rita Silva, atleta portuguesa que se estreou neste evento o ano pasado, cando se proclamou campioa de Portugal de salto de lonxitude, e que repetiu este ano para realizar, nesta ocasión, o triplo salto. Ana Rita realizou o segundo mellor salto da tarde chegando ós 10.97 metros de distancia. 

Xunto a elas saltaron Diego Míguez, atleta do Club Atletismo Sada (filial da Gimnástica), xunto con Sergio Coello e Isaac Casal, atletas da Gimnástica. Tamén estivo con eles Tomás Dinis, do Atletismo Porto. Tomás foi segundo esta vez, acadando os 13.95 metros, só por detrás de Sergio Coello quen, xogando en casa, realizou un salto que chegou ós 14 metros, prácticamente saíndo fóra do foso de area preparado para a ocasión. 

 O broche final púxoo o salto con pértega, onde, co récord recentemente acadado polo atleta Armand Duplantis, foi a proba con máis expectación da tarde.

Os alí presentes tiveron a ocasión de ver a grandes especialistas na modalidade, como a gimnástica Marina Artemia Pérez, Nerea Fernández, Lola Bouza ou Manuela Blanco, sobrevoando todas elas o listón colocado entre os 3.20 e 3.80 metros. No caso dos rapaces, o espectáculo estivo a cargo de Matías Moldes e Tomás López, da Gimnástica, e de Pablo Fernández. A sensación da proba foi, sen dúbida, o gimnástico Oriol Almirall, poseedor do récord do club, quen conseguiu enmudecer a toda unha praza da Ferrería cando clavou a pértega para saltar os 5.20 e levantar os aplausos e a ovación de todos.

Durante o evento estiveron presentes moitos pequenos acompañados de pais, nais, avós, que desfrutaron por igual da emocionante exhibición realizada polos atletas convidados. Moitos deses pequenos seguramente soñaron por un momento con ser atletas e por iso o club informou a todos os interesados de que o 19 deste mes se abriron as inscricións da Escola de Atletismo do Club, onde todos eles aprenderán da man dos adestradores dun dos mellores clubs do país. 

 Foi unha xornada inesquecible pola que querermos agradecer ós asistentes, ós atletas que aceptaron o convite do club, ós que se interesaron para participar e ó Concello de Pontevedra, que colabora ano tras ano na organización dunha tarde diferente de atletismo na rúa.

Vémonos o ano que vén!