Así será o percorrido da volta da San Silvestre

Así será o percorrido da volta da San Silvestre

Xa coñecemos o percorrido da San Silvestre de Pontevedra de 2022, a que quere volver á normalidade. Será de aproximadamente 4.000 metros.

A saída e meta, como é habitual, será dende a Avenida de Montero Ríos, ao lado da Alameda de Pontevedra. Dende esa rúa escoitarase o pistoletazo de saída e, posteriormente, a chegada á liña meta; cando se saberá quen serán os que se impoñan nesta trixésimo novena edición.

Unha vez que os participantes saen de Montero Ríos, pasarán pola Praza de España, Alameda, Raíña Victoria, Xeneral Rubín, Iglesias Vilarelle; rodeoarán a Igrexa de San Xosé para seguir pola Praza da Constitución. Posteriormente, continuarán pola Praza de Galicia, Andrés Mellado, Peregrina, Oliva, Marqués de Riestra, Gutiérrez Mellado, Michelena, Praza da Peregrina, Ferrería, Soportais e Praza de Curros Enríquez. Continuarán pola Rúa Real, Sarmiento, Gregorio Fernández, Praza da Pedreira, César Boente, Sierra, García Escudero, Ponte, San Telmo, Barón, Praza do Muelle, Arcebispo Malvar, Condesa Pardo Bazán e a Praza Concepción Areal. Neste punto xa se enfrontarán aos últimos tramos por Martitegui, Prudencio Landín, Praza de España e regreso á Avenida de Montero Ríos.

Recorrido San Silvestre Pontevedra 2022

Respecto a outras edicións, haberá novidades no percorrido pola zona próxima a Campolongo, debido ás obras que se están realizando no Paseo dos Gafos.

Con este circuíto, os inscritos poden visitar algúns dos lugares máis emblemáticos da cidade de Pontevedra, nós propoñemos algunhas suxerencias.

Para coñecer máis da San Silvestre deste ano, podes mirar o regulamento do evento.

Revisa cando te podes inscribir na San Silvestre de Pontevedra

Revisa cando te podes inscribir na San Silvestre de Pontevedra

Queda pouco máis dun mes para a San Silvestre de Pontevedra 2022 e xa se pode apuntar no calendario cando comezan as inscricións.

Cambio de ubicación

As inscricións realizaranse na planta de arriba do Mercado de Abastos co seguinte horario e datas:

  • Do martes 20 ao 23 de decembro: de 17:30h a 20:30h.
  • Do luns 26 ao venres 30 de decembro: de 10:30h a 13:30h e de 17:30h a 20:30h.
  • O sábado 31 de decembro de 10:30h a 13:30h.

Polo tanto, tras varios anos onde a xente se apuntaba na Casa da Luz ou en Miler Vintage Running Club, este ano cambiamos e estaremos no Mercado de Abastos. É un dos edificios máis emblemáticos da cidade de Pontevedra, ás beiras do Lérez.

As inscricións serán gratuítas. Cada participante terá que levar un dorsal visible no peito. Estas identificacións serán obrigatorias para optar aos diferentes premios e agasallos que se entregarán. Aínda que anotarse sexa de balde, dende a Sociedad Gimnástica de Pontevedra, entidade organizadora, agradecerse a aportación voluntaria de 1€ por cada dorsal para apoiar a labor do noso club na promoción do atletismo na nosa comarca.

No momento de recoller o dorsal, haberá que entregar produtos de alimentación imperecedoiros, polo menos un quilogramo, para doar ao Banco de Alimentos de Pontevedra.

Obxectivo: superar os 7000

Animamos a todos os pontevedreses/as e veciños/as dos concellos limítrofes a participar na San Silvestre de Pontevedra 2022. Este ano buscamos superar o noso récord do 2019, cando fomos 7.000 inscritos.

Este ano a San Silvestre volve ás rúas da Cidade de Pontevedra, e con ela volverán as cores, a ilusión, os disfraces e a festa que tanto definen este evento. Proximamente publicaranse máis información, como a recollida de dorsais, os premios ou o recorrido.

Pouco a pouco seguiremos informando das novidades.

Volve o Nadal a Pontevedra

Volve o Nadal a Pontevedra

En Pontevedra o evento que marca o Nadal é a San Silvestre e este ano volve xa a clásica e tradicional San Silvestre 2022, sen restricións, pero cun novo obxectivo: conseguir que os pontevedreses e pontevedresas volvan a encher as rúas da cidade do Lérez, tal e como pasou en 2019 con 7.000 inscritos. Ese foi fito máximo de inscricións e conseguiu colocarnos no mapa nacional como unha das san silvestres máis multitudinarias se o comparamos coa poboación total da cidade organizadora.

Dende a Sociedad Gimnástica de Pontevedra, entidade organizadora queremos que entre todos nos superemos e volvamos a colocarnos no epicentro do deporte español. A Boa Vila é unha cidade moi ligada ao deporte. Aquí organízanse ao longo do ano unha gran cantidade de eventos deportivos profesionais que atraen a unha inxente cantidade de deportistas, afeccionados e público que ven de Pontevedra unha cidade idílica e sa. Este Nadal imos demostrar que non so hai que traer eventos de nivel para darnos conta de que estamos a altura, os pontevedreses tamén sabemos valorar a cidade e conseguir reflexar que a mellor San Silvestre de España é a Pontevedresa.

Atrás quedaron os anos da pandemia onde tivemos que reiventarnos para poder manter este evento, que é unha data marcada no almanaque do nadal pontevedrés.

Dous anos con “san silvestres” reinventadas

En 2020 inventouse unha #RaraPeroSanSilvestre. Intentouse que os que se inscribiran no evento puideran recorrer as rúas e parques do Concello de Pontevedra individualmente ou en grupos reducidos para evitar os contaxios. Un total de 10 percorridos distintos nos que se intentou que non se perdese a base do maior evento pontevedrés do nadal.

En 2021 buscamos achegarnos un pouco máis ao evento tradicional. Dende as Marismas de Alba e con saídas a diferentes horas xa se fixeron grupos para que os corredores competisen en grupos máis multitudinarios.

Este ano a San Silvestre volve ás rúas da Cidade de Pontevedra, e con ela volverán as cores, a ilusión, os disfraces e a festa que tanto definen este evento. Proximamente publicaranse máis información, como a recollida de dorsais, os premios ou o recorrido.

Reyes Estévez e Marta Prieto gañan o Gran Fondo Caixabank

Reyes Estévez e Marta Prieto gañan o Gran Fondo Caixabank

O tempo non acompañou nun Gran Fondo Caixabank que volveu a súa normalidade despois de dous anos da pandemia. Porén, as gañas e a ilusión encheron as rúas da cidade do Lérez.

Na categoría absoluta impúxose o atleta internacional Reyes Estévez, que mantivo un man a man con Anxo Castro en todo momento. Terceiro foi o atleta da Sociedad Gimnástica de Pontevedra, Carlos Porto, que debutaba na distancia.

En categoría feminina, gañou a atleta do club madrileño AD Marathon, Marta Prieto, tamén debutante na distancia. Venceu sobre unha veterana do Gran Fondo Caixabank como é Beatriz Fernández. No terceiro lugar quedou Verónica Bugliot.

Nos 10km a vitoria foi para Roi Estévez do CA Santiago, segundo quedou Rubén Diz e terceiro Manuel Marchena. Na categoría feminina gañou Begoña Domínguez, do Ourense Atletismo. A súa compañeira de equipo Vicky Losada quedou segunda e a medalla de bronce foi para Cora Saburido.

O primeiro atleta local foi Manuel Lorenzo, atleta da Sociedad Gimnástica de Pontevedra. En féminas non se entregou este galardón por non cruzar a liña de meta no tempo establecido no regulamento.

Este ano como novidade tamén houbo dúas probas para os máis pequenos, que foron un éxito de participación, especialmente de atletas da entidade organizadora.

A Sociedad Gimnástica de Pontevedra profeta na súa terra

Equipo masculino da Sociedad Gimnástica de Pontevedra no medio maratón do Gran Fondo Caixabank
Equipo masculino da Sociedad Gimnástica de Pontevedra no medio maratón do Gran Fondo Caixabank

Este ano tamén se celebrou o Campionato Galego de Medio Maratón, tanto en categoría individual como por equipos.

Carlos Porto quedou subcampión galego cun tempo de 01:08:10. Ademais, por equipos o combinado masculino fíxose co ouro, grazas aos puntos aportados polo propio Porto, Manuel Lorenzo (5º), Manuel Hurtado (7º) e Iago Pereira (60º).

Por categorías, Iago quedou campeón galego sub23 e Hurtado foi subcampión galego en máster M35.

Máis de 1000 participantes no Gran Fondo Caixabank

Máis de 1000 participantes no Gran Fondo Caixabank

O Gran Fondo Caixabank pecha as inscricións con máis de 1000 inscritos. De eses, 572 participantes son do medio maratón e 334 dos 10km. Hai que engadir que hai un total de 165 participantes que so se inscribiron no Campionato Galego de Medio Maratón e non na proba popular. En total, o número de participantes sería de 1.071. A carreira de cativos aínda ten o prazo de inscrición aberto, pero por agora hai máis de 140 nenos e nenas apuntados.

Atletas destacados

Entre os atletas máis destacados na longa distancia están:

  • Reyes Estévez: finalista nos Xogos Olímpicos de Atenas 2004 e varias medallas internacionais e nacionais. Foi terceiro en dous mundiais de aire libre, en Atenas 1997 e Sevilla 1999. A nivel continental é campión europeo en Budapest 1998 e subcampión en dúas ocasións. En aire libre en Munich 2002 e baixo teito en Lisboa 2001. En pista cuberta, tamén quedou terceiro no Europeo de Madrid en 2005 por partida dobre, nos 1500ml e nos 3000ml.
  • Manuel Hurtado: gañou o ano pasado e é o atleta con máis vitorias no medio maratón de Pontevedra. Conta con catro en total. Tamén foi dúas veces campión galego na distancia e quere ir en busca da terceira.
  • Carlos Porto: gañador nos 10km do ano pasado. Vixente campión galego de 800ml ao aire libre. Titular no equipo da Sociedad Gimnástica de Pontevedra nas ligas de atletismo tanto nas probas de mediofondo como de fondo. Debuta na distancia do medio maratón.
  • Manuel Lorenzo: cuarto o ano pasado e titular coa Sociedad Gimnástica de Pontevedra en probas de fondo.
  • Anxo Castro: gañador na edición de 2019.
  • Soledad Castro Soliño: categoría máster. Atleta internacional. Foi 10 veces campioa galega de medio maratón. Récord galego na distancia en categorías máster M40, M45, M50
  • Andrea Iglesias: terceira o ano pasado nos 10km. É triatleta internacional.
  • Ángela Rodríguez: subcampioa o ano pasado no medio maratón.

Nos 10km sobresae, sobre todo, Cora Saburido, que quedou segunda o ano pasado nesta distancia.

No Campionato Galego de Medio Maratón por equipos, a Sociedad Gimnástica de Pontevedra, entidade organizadora, opta ao primeiro posto na categoría masculina coas participacións de Manuel Hurtado, Carlos Porto e Manu Lorenzo.

Dorsais:

Unha vez finalizado o prazo de inscricións, os atletas poderán retirar os seus dorsais. Será obrigatorio portar o dorsal no peito e ten que estar visible. Non se poderá dobrar nin ocultar. As datas para recoller estas identificacións son do 13 ao 15 de outubro na tenda Miler Vintage Running Club, rúa Peregrina, 6 (soto), en Pontevedra. Poderase recoller durante o horario de apertura do comercio. Este ano tamén recupérase despois dos anos da pandemia a recollida o mesmo día da proba. O 16 de outubro en horario de 08:00h a 10:30h poden coller os seus dorsais so os deportistas que son fóra de Pontevedra. O punto de entrega será o Pavillón Universitario.